BANYUMAS-Pirang dalan nasional kususe jurusan Ajibarang-Wangon karo Wangon Rawalo sing bodhol merekna nyuda keamanan karo kenyamanan wong sing nyupir mobil utawa numpak motor. Warga njaluk dalan bodhol mau gagian dedandani.
Dalan bodhol parah neng sendhuwure persis brug Kali Tajum perbatasan Desa Karangbawang karo Pancasan, Kecamatan Ajibarang malah ngasi merekna mobil motor sing liwat kudu gentenan. Dalan bodhol sing rupane dalan pating jluwag bolong amba merekna supir mobil motor minggrang minggring angger liwat. Apamaning jlubangan dalan sing bodhol reyol mau jero-jero karo amba eram.
“Eram. Dalan nasional koh bodhol reyol. Mulane si mobil karo motor sing padha liwat ora gelem papagan. Mergane angger nekad papagan mesthi bisa kejeglog neng jlubangan dalan. Mulane jane gagiyan dedandani,” ujare Purwanto, wong Purwokerto sing bar liwat maring Wangon lewat Ajibarang pirang dina wingi.
Dalan pating jlubang bisa detemoni neng dalan Ajibarang Wangon kususe neng Desa Windunegara karo Wlahar. Mangsan uda sing kerep uga dadi sebab dalan tambah bodhol karo abote muatan mobil angkutan barang sing eram abote. Mulane warga kepengin pemerentah gagian ndandani.
“Aja ngasi bola bali ana motor kejlubang kecelakaan merga anane dalan pating jlubang. Aja ngasi juga pejabate ngasi kecelakaan gara-gara dalan bodhol kiye. Mulane dinas terkait gagian mikirna karo ndandani,” jelase Purwanto.
Warga Tiparkidul, Ajibarang, Rahmat Aziz uga gumun, neng dalan Pancasan sedurunge brug Kali Tajum sing dalane bodhol jane wis ana pengumuman peringatan anane ‘Jalan Berlubang’ karo diperbaiki. Ningen jebule wong sing ndandani urung ana. Mulane kiye bangeting desayangna retung.
(Baca Juga : Darurat, Warga Sawangan Swadaya Uruk Jalan Kabupaten )
“Apa enggane ana tulisan lagi dalan berlubang karo perbaikan jebule nyatane urung. Kiye kan dadi kepriwe kaya kuwe. Mulane angger wis depasangi pengumuman ya gagian delakoni,” karepe Rahmat.
Neng jurusan Wangon-Rawalo, utamane neng pirang titik dalan nasional uga detemoni dalan bodhol. Warga Purwojati sing saben dina ngodhe neng Purwakerta, Abdul Rohman ngasi tiba pirang dina wingi gara-gara kejlubang dalan bodhol. Udu mung awake thok sing ngrememeh merga tiba, ninge motore sing bagian ngarep uga bodhol.
“Wis awake lara ngrememeh bar tiba, motore jebul kudu ganti rajawali nganti entong Rp 400 ewu. Mbok jan pancen dalan bodhol ngrugekna sekabehane. Untunge nyong esih slamet pas kejlubang tiba, ora ana mobil utawa motor banter sekang mburi,” jere Rohman. (san-3)
