PURBALINGGA – Mangsa Korona kaya siki egin ana bae polahe wong kepungan sabu-sabu. Kaya polahe wong papat nang sewijine umah nang Desa Bojanegara, Kecamatan Padamara, Kabupaten Purbalingga.
Wong kuwe, MA (26) karyawan koperasi simpan pinjam lan JAS (33) pedagang. Wong loro kuwe mau warga Desa Klapasawit, Kecamatan Kalimanah, Kabupaten PurbaIingga.
Ana uga RS (44) wiraswasta warga Kecamatan Sumpiuh, Kabupaten Banyumas. Sijine, EF (22) karyawan swasta warga Desa Cilampeni, Kecamatan Katapang, Kabupaten Bandung.
(Baca Juga: Nia Ramadhani dan Ardi Bakrie Terjerat Narkoba)
Wong papar kuwe mau siki kudu ndekem nang tahanan Mapolres Purbalingga. Mergane pada polah kepungan sabu-sabu. Kepungan kuwe padha delakoni Senin (28/6/2021) nang sewijine umah Nang Bojanegara, Kecamatan Padamara.
Kabag Operasi Polres Purbalingga Kompol Pujiono pas menehi keterangan, Senin (12/7/2021) ngendika, ukara babagan pidana narkoba kayonge durung ilang nang Tlatah Perwira.
“Petugas ngamanaken papat tersangka yang sing lagi asyik pesta narkotika jenise sabu-sabu,” ngendikane Kabag Ops kambi Kasat Reserse Narkoba AKP Muhammad Muanam lan Kasubbag Humas Iptu Muslimun.
Barang Bukti
Seka wong papat kuwe, pulisi ngamanaken barang bukti wujud sabu sing abote 0,53 gram, rong iji bong utawa alat isep sabu, plastik klip transparan bekas wadah sabu, kethokan sedotan, pipet kaca lan rek jres. Kejaba kuwe deamanaken kertu ATM lan hape nggone tersangka.
Tersangka MA ngomong, menawa sabu-sabu kuwe mau tuku maring wong sing ora dekenal sapa jenenge. Carane, dhuwite detransfer maring rekeninge wong kuwe mau. Let ora suwe, sabu-sabune dekirim maring alamat sing wis desepakati.
“Nah, bosa sabu-sabu kuwe wis butul, banjur dekonsumsi. Ora dhewekan, ningen bareng kambi wong telu kancane,” ujare Pujiono.
Kabag Ops ngendika, tersangka papat kuwe dejiret nganggo Pasal 114 ayat (1) utawa Pasal 112 ayat (1) lan utawa Pasal 127 ayat (1) huruf a UU RI Nomor 35 Tahun 2009 babagan Narkotika.
Ancaman ukuman pasal kuwe kunjara paling sedela patang taun lan paling suwe 20 tahun, lan denda paling setithik Rp 800 juta lan paling akeh Rp 10 miliar. (ri-4)
