BANYUMAS-Umahe kaki Hasan Rusdi (85) tukang adzane Mesjid Al Muslimun 1, neng Grumbul Gunung Barang Lor, Desa Krajan, Kecamatan Pekuncen kobong, Jemuah (25/1/2020) wengi. Ora ana kurban jiwa, ningen sing duwe umah tuna dunya ngasi Rp 65 juta.
Kepala Desa Krajan, Muflichudin nuturna menawa kedadian kobonge umah muadzin kiye wektu sing duwe umah karo bojone Nini Siti lagi padha jemangah sembahyang ngisya neng mesjid sing ora adoh karo umahe. Umah kobong mau kewenangan dening tanggane sekitare jam 7 seperapat wengi.
“Wektu kedadian Kaki Hasan karo bojone Nini Siti lagi padha jemangah ngisya neng mesjid. Ngerti-ngerti dekabari tanggane karo wis krungu geger menawa umahe wis kobong. Genine mulab-mulab nduwur wuwungan umah,” jere Muflich.
Bar krungu ana kedadian umah kobong mau, warga sekitare kono langsung padha metu. Wong-wong padha usaha nyipet geni sing mulab-mulab. Ningen saking gedhene geni, wong ora teyeng nyipet ngasi rampung. Untung ora let suwe terus ana armada montor pemadam kebakaran sing deceluk dening pemerintah desa.
“Ningen bubar desipet nganggo ‘pemadam kebakaran’ umah wis bersih, entong grontong bersih limit. Sing lewih mung gari pedagange thok. Ningen dunya brana sing ana neng njero umah wis kobong,” jere pamong desa Krajan, Agus Giniarso.
(Baca Juga : Innalillahi! Rumah Muadzin Masjid Kebakaran)
Sekang Geni Lilin
Bareng detliti urutan kedadian kobong umah mau deng pulisi sektor Pekuncen, kedadian kobong mau merga jalaran sekang anane geni lilin sing mlembet. Kaki Hasan Rusdi ngurubna lilin mergane wektu sekang sore tekan wengi, wilayah Pekuncen khususe Krajan mati listik. Pancen kawit jam 4 an sore ngasi sendhekala, udan lagi gedhe-gedhe .
“Jerene bar ngurubna lilin neng bale umah, banjuran sing duwe umah kuwe maring mesjid Al Muslimun 1 Krajan kaya biasane. Dadine murube lilin malah mlembet maring ngendi ora ngasi akhir umahe kobong kuwe. Pancen ngasi wektu sendhekala uga esih ana udan gebret karo mati listrik,” jere Midin, wong kono sing tilik bekas umahe Kaki Hasan Rusdi Setu (26/12/2020) esuk.
Bar kedadian kobongan umah mau, Kak Hasan Rusdi karo Nini Siti ngungsi manggon neng nggone anake. Bojo laki sing wis kelebu sepuh mau pancen duwe anak lima karo duwe putu. Ningen sedawane urip, wong loro mau pancen sregep maring mesjid.
(Baca Juga : Penyebab Kebakaran Rumah Muadzin dari Api Lilin )
Setu esuk, Kaki Hasan Rusdi mung bisa mlongo ndeleng bekas umahe sing entong grontong merga kobong. Dunya brana sing ana neng umah wis bersih limit ora ana lewihane babar blas. Beras 10 kilo sing ana neng umah uga wis kobong. Dunya sing ana mung ana klambi sing denggo. Kejaba sajadah, Kaki Hasan Rusdi mung gari klambi, sarung karo kupluk. Angger Nini Siti mung gari klambi ondher terus rukuh sing nggo pranti sembahyang. (Susanto-)
