PROGRAM vaksinasi Covid-19 wis dilabuhi kawit 13 Januari 2021 kepungkur. Sing wis decuplik utawa devaksin, senajan urung kabeh, ningen wis lumangyan akeh. Wong sing devaksin tetep kudu nglakoni 5M.
Polahe wong decuplik uga akeh sing merguyokna. Ana wong sing gagah, lengene pating pethekol, ning mbarang weruh dom suntik, ngorong-ngorong kami gilan, wedi desuntik.
Kejaba akeh polah sing merguyokna, sewise cuplikan banjutan ana pitakonan, apa angger wis decuplik Covid-19, terus ora bakal ketularan corona? Pitakonan kuwe mau kewetu mergane pancen ana kanca batir sewise decuplik pisanan, bar decuplik awake terus rumab, awake panas terus mriyang. Merga kewatir, kanca batir kuwe mau priksa maring dokter. Mbarang ditest, kanca batir kuwe mau positif Covid.
”Lha si priwe, jere wis devaksin deneng esih kenang covid,” pitakonane tangga teparo sing krungu ana wong ketularan corona sewise decuplik. Vaksin pancen dudu obat.
(Uga Dewaca :Usia Lebih dari 60 Tahun, Jurnalis ini Tak Ragu Ikut Vaksinasi)
Vaksin kuwe zat sing nguja digawe kanggo ngrangsang supayane awak bisa kebal maring salah sijine prenyakit. Angger wis divaksin dadi ora gampang ketularan merga wis kebal. Mung bae, jere sejawat dokter, angger wis divaksin Covid-19, udu jaminan wong ora bakal ketularan corona. Mergane vaksin corona mbutuhna rong dosis suntikan.
Uga butuh wektu sewulan kanggo nyiptakna kekebelan sing ampuh maring awak. Dadi angger wis decuplik sepisan banjutan ana wong sing terus dinyatakan positif covid, merga pas devaksin wong kuwe mau, senajan keton bregas, ning wis kenang infeksi Covid-19.
Dadi sewise decuplik, wong kuwe mau ora jere kebal ning malah dadi tambah kenang Covid-19. Ning merga vaksinasi pancen wis kebukti dadi srana sing ampuh supayane salah sijine prenyakit, kaya Covid-19, ora terus mambrah-mambrah, cuplikan utawa vaksinasi bakale dadi program sing kudu dilakoni.
Vaksinasi Covid-19 agep diterusna ngasi kabeh wong bisa decuplik. Sing kudu digatekna dening masyarakat, senajan program vaksinasi terus mlaku, masyarakat ora kena lena. Tegese, masyarakat sing wis olih giliran decuplik kudu tetap manut maring protokol kesehatan yakuwe nglakoni 5M.
Senajan wis decuplik, warga masyarakat kudu tetap manut nglakoni 5M (memakai masker, mencuci tangan pakai sabun dan air mengalir, menjaga jarak, menjauhi kerumunan, serta membatasi mobilisasi dan interaksi).
