PURBALINGGA – Dinas Perindustrian dan Perdagangan (Disperindag) Kabupaten Purbalingga nemu panganan jamuren lan kedaluarsa sing egin didol, nang toko modern. Barang kuwe konangan pas agi nganakna inspeksi mendadak (sidak) maring toko-toko modern, Selasa (4/5/2021).
Kasi Distribusi Perdagangan nang Bidang Perdagangan Dinperindag Purbalingga, Martha Dwi Hudiyati ngendika, sidak dianakna nggo njamin panganan sing didol layak dipangan nang masyarakat Purbalingga.
“Ana pirangiji sing ditemokna petugas. Ana sing bungkuse bodol, tekan sing kedaluarsa,” ngendikane Martha maring Suara Banyumas.
Prodak panganan sing wadahe bodol, kayata biskuit sing kalenge peyot. Dekhawatirna panganan kuwe terkontaminasi sebab, bisa bae kalenge wis teyengen. Dadi produke ora resik uga patut depangan maning.
(Uga Dewaca: Nembe Dog Sekang Perantoan, Sewelas Warga Tumanggal Langsung Dites Rapid)
“Uga ana panganan sing wis jamuren. Ewadene masa kedaluarsane egin suwe, ningen olehe mbungkus ora sempurna dadine marakna jamuren. Kuwe nyilakani pisan,” ujare.
Pancen, mangsan arep bada Idulfitri, cokan akeh panganan sing kondisine ora layak depangan. Biasane bakule ana sing nggratil. Panganan rusak kuwe dislesep-slesepna maring prodak sing bener.
“Prodak sing rusak kuwe langsung ditarik kon aja didol. Prodake kuwe kon dilukir kambi prodak sing bener maring selese,” ujare dhekne.
Martha nambahi, Dinperindag arep terus nganakna sidak razia maring toko-toko modern lan pasar-pasar. Dadi masyarakat Purbalingga ora kuwatir mangan panganan sing ora layak. (ri-4)
