BANYUMAS- Ketua PCNU (Pengurus Cabang Nahdlatul Ulama) Banyumas ngarepna pemerentah bisa nyuda kebijakan utawa informasi sing gawe was-was masyarakat kususe sing gegandengan karo perkara Covid-19.
“Tumrape pemerintah sing dadi pelayane masyarakat kudune lewih ngutamakna pendidikan karo ngewulani masyarakat. Malah lewih apik maning nyuda aweh kebijakan utawa informasi sing gawe masyarakat pada was sumelang, apamaning babagan ngibadah,” Ketua PCNU Banyumas, Kiai Sabar Munanto nguntabna kekarepane maring pemerentah.
Kiai Sabar weling maring warga NU neng Banyumas kon aja padha kendho goli ngibadah Romadhon. Senajan ana kasus positif Covid-19 sekang jamaah traweh neng Tanggeran Kecamatan Somagede karo Pekaja, Kecamatan Kalibagor.
“Wong muslim Banyumas, kususe Nahdliyin aja kendhor, mung gara-gara geger klaster traweh. Malah kudune padha tambah sregep ngibadah neng 10 dina akhir Romadhon kaya tuntutane Kanjeng Nabi Muhammad,” jelase Ketua PCNU Banyumas, Sabar Munanto.
(Baca Juga : Muncul Klaster Covid-19 Jemaah Tarawih di Banyumas, 52 Orang Positif)
10 Dina Akhir
Mlebu 10 dina akhir Romadhon, ulama, kiai karo tokoh agama dikarepna padha tetep aweh semangat sregep ngibadah. Welinge Kiai Sabar mau kanggo ngimbangi ramene geger mower berita klaster trawe. Mergane ramene kedadian mau, akeh wong muslim padha kendho goli ngibadah trawe.
“Anane klaster trawe kudune malah gawe imane inyong rika padha tambah kuwat. Mulane anane warta Covid-19 kudu desikapi bareng. Carane, ya bareng-bareng kompak nglakoni protokol kesehatan,” Kiai Sabar njlentrehna.
Mulane, Kiai Sabar ngimbuhi menawa pathokan karo tuntutan protokol kesehatan era anyar Covid-19 kudu terus deamalna. Aja ngasi anane tuntutan era anyar mung nggo pengetahuan. Woro-woro pemerentah maring warga kususe Nahdliyin supaya aman ngibadah neng situasi pandemi kudu debanterna maning.
PCNU Banyumas kawit awal wis aweh info maring wong NU kususe neng struktural tingkat ranting ngasi anak ranting. Pathokan protokol kesehatan neng wulan puasa wis deumumna lewat ceramah, tulisan, digital ngasi media liyane.
5 M sing wujude njaga jarak, wisuh tangan nganggo sabun karo banyu mili, nganggo masker, ngilari rubungan, wis degethok tularna maring warga NU tekan ndesa-ndesa. Udu mung kuwe woro-woro ngibadah Romadhon neng umah angger lara karo tumprap bocah cilik uga wis degamblangna maring pengurus NU. (san-3)
