PURBALINGGA – Kaki Achmad Mujamil (60) warga Desa Majasari RT 2 RW 3, Kecamatan Bukateja Purbalingga seda gegara kesamber bledhek, Jumat (22/1) sep.
Kapolsek Bukateja Iptu Wartono ngendika, kacilakan kuwe kedadean nang sawah Desa Majasari kira-kira jam 15.00 WIB.
Seka keterangan sing dekumpulna nang lapangan, sedurung kedadean, Kaki Jamil awan kuwe lunga maring sawah. Bosa wis mandan sore, ndilalah kahanan udan gedhe pisan, bledheke glemugur.
(Uga Diwaca : Waspadai Cuaca Ekstrem, Kenali Tanda-tandanya)
“Korban terus mlaku bali maring umah. Nah, bisa egin nang sawah, ijig-ijig ana bledhek nyamber dhekne,” ujare Kapolsek.
Kaki Jamil terus ngglethak nang kono. Wong sing weruh kedadean kuwe, banjur nulung kurban. Dhekne degawa maring rumah sakit.
(Uga Diwaca: Insyaallah, Bandara JB Soedirman Purbalingga Rampung Ngesuk Bada)
“Jalaran kesamber bledhek kuwe, kurban ngalami tatu bakar nang awake. Sayange, nyawane kurban ora ketulungan. Bosa butul rumah sakit, dhekne seda,” imbuhe Kapolsek.
Kurban akhire degawa balik umah, banjur desarekna nang kuburan desa cedhek umah.
Waspadha
Kapolsek weling maring warga masyarakat, merga siki esih mangsa udan, warga kon padhan waspada. Angger wis udan teka, kudu cepet-cepet mingser ngiyub nang panggonan sing aman.
“Awake dhewek padha kudu sing ati-ati tur waspadha, aja nganti kecilakan kesamber bledhek kaya kuwe kedadean maning,” ujare. (ri-4)
